नगरबासीले बिना धितो २ प्रतिशत ब्याजदरमा ५ लाख सम्म ऋण पाउने

जिल्लाको चौतारा साँगाचोकगढी नगरपालिकाले आफ्ना नगर भित्रका नागरिकलाई २ प्रतिशत व्याजदरमा सहुलियतपूर्ण ऋण उपलब्ध गराउने भएको छ । २ प्रतिशत ब्याजदरमा उपलब्ध हुने "सहुलियतपुर्ण कर्जा"को लागि बुधबार चौतारा साँगाचोकगढी नगरपालिका र नेपाल बैंक लिमिटेड बिच बैंकको केन्द्रिय कार्यालय काठमाडौंमा कर्जा सम्झौता भएको छ ।

नेपाल बैंक लिमिटेड केन्द्रिय कार्यालयका प्रमुख कार्यकारी अधिकृत कृष्ण बहादुर अधिकारीको कार्यालयमा एक कार्यक्रम आयोजना गरि चौतारा साँगाचोकगढी नगरपालिका नगर प्रमुख अमानसिं तामाङ, उपप्रमुख जानुका पराजुली, प्रमुख प्रसाशकीय अधिकृत कृष्ण प्रसाद पाण्डे, नेपाल बैंक लिमिटेड बागमती प्रदेश प्रमुख सुन्दर पन्थी र नेपा बैंक लिमिटेड सिन्धुपाल्चोक शाखा प्रबन्धक समिक कुमार दाहाल लगाएतको उपस्थितमा कर्जा सम्झौता गरिएको हो । यसबाट कृषी, पशुपालन, घरेलु उद्योग तथा अन्य नयाँ ब्यावसाय सन्चालन गर्न चाहने नगरबासीहरु प्रत्यक्ष लाभान्वित हुने नगरपालिकाले जनाएको छ । चौतारा साँगाचोकगढी नगरपालिकाले युवा स्वरोजगार प्रवर्द्धनका लागि बिनियोजन गरेको १ करोड र नेपाल बैंक लिमिटेडले थप १ करोड गरि यस बर्ष २ करोड ऋृण प्रवाह हुने चौतारा साँगाचोकगढी नगरपालिकाका मेयर अमानसिंह तामाङले सिन्धुज्वलालाई जानकारी दिए । उनका अनुसार ऋृण लिन चाहने नगरबासीहरुले २ प्रतिशत ब्याजदरमा ५ लाखसम्म बैंकको नियमानुसार बिनाधितो ऋृण लिन सक्नेछन् । ‘नगरपालिकाले कोरोना भाइरसका कारण आफ्नो रोजगारी गुमाएका, बिदेशबाट फर्किएका, कृषि तथा लघु उद्यमको क्षेत्रमा स्वदेशमै व्यावसाय गर्ने योजना बनाएका युवाहरुलाई लक्षित गरि ‘स्वरोजगार तथा उद्यम प्रवर्द्धन कार्यबिधी २०७७’ बनाएर सहुलियतपूर्ण ऋण उपलब्ध गर्न लागेका हौं’, मेयर तामाङले भने । स्थानीय स्रोत, साधन र सिपलाई सदुपयोग गरी स्थानीय स्तरमा रोजगारी श्रृजना गर्न,आत्मनिर्भर अर्थतन्त्रको विकास गरी सुन्दर नगर र सुखी नगरबासीको आकांक्षा पुरा गर्न नगरपालिकाले नेपाल बैंक लिमिटेडसँग सम्झौत गरि सहुलियतपूर्ण कर्जामा व्याज अनुदान उपलब्ध गराउन लागेको उपप्रमुख जानुका पराजुलीले बताईन । ‘हामिले यस बर्ष देखि यो कार्यक्रमको शुरूवात गरेका छौ । यसको रिजल्ट हेरेर आगामि वर्ष पनि यस कार्यक्रमलाई निरन्तरता दिनेछौ’, उपमेयर पराजुलीले भनिन् ।सहुलियतपूर्ण कर्जाले नगरभित्र नयाँ उद्यमि तथा व्यावसायीको संख्या बढ्ने र नगरलाई थप समृद्ध बनाउन सहयोग पुग्ने अपेक्षा राखेको उनले बताईन । यस प्रकारको कार्यक्रमले स्थानीय स्तरमा रोजगारी श्रृजना गर्न, आत्मनिर्भर अर्थतन्त्रको विकास गरी सुन्दर नगर र सुखी नगरबासीको आकांक्षा पुरा हुने नगरप्रमुख तामाङको ठम्याई छ । उनका अनुसार नगरपालिकाको प्रत्येक बस्तीमा पुगेर जनतासंग प्रत्यक्ष छलफल गरी नयाँ कार्यक्रमहरु बनाएर विकासका कामहरु संचालन गर्ने छ । त्यसको सुरुवात समेत भैसकेको समेत उनले बताए । सोही कार्यक्रम अनुसार सोमबार इर्खुको चिलाउने गाँउमा नगर प्रमुख, नेकपा नगरकमिटी इन्चार्ज लगायतको उपस्थितिमा एक कार्यक्रम आयोजना गरिएको थियो ।

समाचार श्रोत : सिन्धुज्वाला अनलाइन पत्रिका, लोकप्रिय समाचार अनलाइन तथा पत्रिका